Qendra Kombëtare e Edukimit në Vazhdim është një institucion publik, buxhetor që funksionon si një agjenci teknike e Ministrisë së Shëndetësisë. Ajo planifikon, koordinon, monitoron dhe vlerëson aktivitetet e edukimit të vazhduar përmes funksionimit të bashkërenduar të sektoreve të saj.

Fushat kryesore të veprimtarisë së QKEV janë:
•    Planifikimi, bashkërendimi dhe zbatimi i programeve të edukimit të vazhduar të punonjësve të shëndetësisë;
•    Bashkërendimi i punës dhe realizimi i procesit të akreditimit të programeve dhe veprimtarive te zhvillimit profesional, pa përfshirë programet në varësi të Ministrisë së Arsimit dhe Shkencës dhe strukturave të saj si dhe të procesit të ricertifikimit;
•    Realizimi i studimeve për vlerësimin e nevojave për edukim të vazhduar, për kategori të ndryshme të punonjësve të shëndetësisë;
•    Vënia në zbatim e programeve të trajnimit, përmes mobilizimit dhe kontraktimit të universiteteve, shkollave universitare, institucioneve akademike, si dhe organizatave të specializuara, shqiptare ose të huaja;
•    Ngritja e një qendre informacioni për aktivitetet e edukimit të vazhduar dhe materialeve pedagogjike të përdorura gjatë këtyre aktiviteteve;
•    Mbështetja, rritja e njohurive dhe përmirësimi i aftësive mbi teknikat andragogjike (pedagogjia për të rritur) të trajnerëve në fushën e shëndetësisë;
•    Bashkërendimi i punës me institucionet arsimore që përgatitin profesionistë të shëndetësisë, si dhe me të gjitha institucionet shëndetësore e organizatat profesionale, në mbështetje të procesit të ricertifikimit të personelit në fushën e shëndetësisë.